Ашура күні әл-Мухаррам айының оныншы күніне сәйкес келеді және мұсылмандар үшін ерекше маңызға ие. Ашура күні Алланың пайғамбарлары мен елшілеріне қатысты маңызды оқиғалар орын алды. Осы күні Нұхтың (Ноя) кемесі құрлыққа шықты, сол себепті Нұх (оған Аллаһтың сәлемі болсын) жыл сайын осы күні шүкіршілік ретінде ораза ұстайтын. Сондай-ақ, Ашура күні Мұса (Моисей) мен оның халқы әскерімен бірге топан суда қаза тапқан залым перғауыннан құтқарылды. Мұса да (оған Аллаһтың сәлемі болсын) Аллаһтың құтқарғанына шүкіршілік ету үшін жыл сайын осы күні ораза ұстауды әдетке айналдырған.

Екі "Сахих"-те Ибн Аббастан (р.а.) жеткен хадисте, одан Ашура күні туралы сұралғандығы айтылады. Және ол былай деп жауап берді: «Мен Аллаһ Елшісінің (оған Аллаһтың игілігі мен сәлемі болсын) басқа күндер ішінен осы күн (яғни, Ашура күні) және осы ай (яғни Рамазан айы) сияқты қадір-қасиетіне ие болуға ұмтылған күнді көрген емеспін».

Муғауиядан (р.а.) екі «Сахихте» риуаят етілген: «Мен Аллаһ Елшісінің (оған Алланың игілігі мен сәлемі болсын) былай деп айтқанын естідім: «Бұл – Ашура күні, Аллаһ (бұл күні) ораза ұстауды парыз еткен жоқ, бірақ мен ораза ұстаймын. Кім қаласа, ораза ұстасын, ал қаламаса, оразасын ашсын». Демек, Ашура күні ораза ұстау – Алла Елшісінің (ﷺ) сүннеті.

Муслим өзінің «Сахихінде» Әбу Қатададан риуаят етеді: «Бір адам Пайғамбардан (оған Аллаһтың игілігі мен сәлемі болсын) Ашура күнінің оразасы туралы сұрағанда, ол былай деп жауап берді: «(Осы күнгі ораза) өткен жылдың күнәларын өтейді».

Ораза ұстаудың үш жолы бар:

1. Үш күн қатарынан: Мұхаррам айының 9-ы, 10-ы, 11-і.

2. Қатарынан екі күн: Мұхаррам айының 9-ы мен 10-ы немесе 10-ы мен 11-і.

3. Бір күн: Мұхаррам айының 10-шы күні.