Бәрәт түні – шағбан айының 15-ші күніне түсетін қасиетті түн. Араб тілінен аударғанда «Бараат» сөзі «тазарту» дегенді білдіреді. Әбу Мұса әл-Ашғариден Алла елшісінің (оған Алланың игілігі мен сәлемі болсын) былай дегені жеткізіледі: «Алла Тағала Шағбан айының ортасына түскен түнде (құлдарына) қарайды, мүшрік (көпқұдайшыл) пен жүрегінде зұлымдық сақтаушыдан басқа (осы түні) барлық жаратылыстарын кешіреді». (Ибн Мажа жинағы)

Осы түні нәпіл намаз оқып, Құран оқып, көптеп зікір айтып, дұға жасаған абзал. Мереке күні мүміндер Аллаһқа жалбарынып, күнәларының кешірілуін сұрайды, Аллаһтан жарылқау мен рақым етуін тілейді. Олар өмірлеріне, істеріне өз-өздеріне есеп беріп, күнәларына тәубе етеді. Сондай-ақ, мұсылмандар ескі реніштерін кешіріп, және өздері ренжіткен адамдардан кешірім сұрайды. Осы себеппен мүміндердің жүрегі ашудан, тәкаппарлықтан, жаман ойдан, дұшпандықтан арылу керек.